दसैँको रमाइलोमा जुवा, चाडपर्व हिरासतमै

विराटनगर । दसैँमा साथीभाइसँग बसेर रमाइलो गर्ने र केही रकम दाउमा लगाएर मनोरञ्जन लिने चाहनाले कतिपयलाई यसपटक प्रहरी हिरासतसम्म पुर्याएको छ । 

जुवा खेलेको आरोपमा पक्राउ परेपछि उनीहरूले दसैँसमेत हिरासतमै बिताउनुपरेको छ ।

कोशी प्रदेशका तीन जिल्लामा दसैँ अवधिभर जुवा खेलेको आरोपमा २० जना पक्राउ परेका छन् । 

प्रदेशका अन्य जिल्लामा पनि जुवाको आरोपमा धेरै जना पक्राउ परे पनि सामान्य रकम राखेर तास खेल्नेहरूलाई प्रहरीले चेतावनी दिएर र पुनः नखेल्ने सर्तमा छाडेको पाइएको छ ।

जुवासम्बन्धी मुद्दामा पक्राउ परेका २० जनाबाट प्रहरीले ६ लाख ९९ हजार ७ सय १० रुपैयाँ बरामद गरेको छ । कोशी प्रदेश प्रहरी कार्यालय विराटनगरका प्रहरी उपरीक्षक सुमन तिम्सिनाका अनुसार दसैँ अवधिमा मोरङ, झापा र सुनसरीमा जुवासम्बन्धी चारवटा मुद्दा दर्ता भएका छन् ।

दसैँको रमाइलोमा जुवा खेल्दा पक्राउ परेकामध्ये अधिकांश चाडपर्व सकिएपछि छुटिसकेका छन् । 

प्रहरीको तथ्यांकअनुसार मोरङमा एउटा मुद्दा दर्ता गरी पाँच जनालाई पक्राउ गरिएको थियो । उनीहरूबाट २० हजार ९ सय ३० रुपैयाँ बरामद भएको थियो ।

झापामा दुईवटा घटनामा पाँच–पाँच जनाका दरले १० जना पक्राउ परेका थिए । 

ती घटनाबाट क्रमशः एक लाख २२ हजार ७ सय ८० रुपैयाँ र एक लाख ८५ हजार रुपैयाँ बरामद भएको थियो । त्यस्तै, सुनसरीमा जुवासम्बन्धी एउटा मुद्दा दर्ता गरी पाँच जनालाई पक्राउ गरिएको थियो । 

उनीहरूबाट तीन लाख ७१ हजार रुपैयाँ बरामद भएको प्रहरी उपरीक्षक तिम्सिनाले जानकारी दिए ।

तीन जिल्लामा भएका घटनाको विवरणले दसैँमा जुवा खेल्ने प्रवृत्ति अझै कायम रहेको देखाउँछ । 

केही समयको रमाइलोका लागि रकम दाउमा लगाउँदा प्रहरीको कारबाहीमा पर्ने र चाडपर्वको समय हिरासतमा बिताउनुपर्ने अवस्था आउँछ । 

दसैँमा परिवार र आफन्तसँग रमाइलो गर्ने अवसरलाई जुवातर्फ मोड्दा आर्थिक जोखिमसँगै कानुनी झन्झटसमेत बेहोर्नुपर्ने हुन्छ ।

चाडपर्वका बेला जुवाजन्य गतिविधि नियन्त्रण गर्न प्रहरीले निगरानी बढाउने गरेको छ । 

तर, कारबाहीमा पर्ने क्रमले मनोरञ्जनका नाममा हुने यस्ता गतिविधि नियन्त्रण गर्न प्रहरीको सक्रियतासँगै नागरिकको जिम्मेवारी पनि उत्तिकै आवश्यक रहेको देखाउँछ ।

कतिपय घटनामा मनोरञ्जनका लागि सामान्य रकम राखेर तास खेल्ने समूहलाई पनि प्रहरीले जुवा खेलेकै आरोपमा कारबाही गर्ने गरेको पाइएको छ ।