पिजफायरका संचालक खत्रीको मृत्यु प्रकरणमा रेष्टुरेन्टकै क्यासियर पक्राउ, स्कुटर पनि भेटियो

विराटनगर । विराटनगरमा रेष्टुरेन्ट सञ्चालन गर्दै आएका मनोज खत्रीको मृत्यु प्रकरणमा प्रहरीले रेष्टुरेन्टकी क्यासियर युवतीलाई नियन्त्रणमा लिएको छ ।

मोरङको केराबारीस्थित धारापानी जंगललमा शनिबार रुखमा झुण्डिएको अवस्थामा फेला परेका ५१ वर्षीय खत्रीको अन्तिम फोन संवादको विवरणका आधारमा प्रहरीले अनुसन्धान अघि बढाएको हो ।

मोरङ प्रहरीका अनुसार झापा घर भएकी २७ वर्षीया युवतीविरुद्ध परिवारका सदस्यले आत्महत्या दुरुत्साहनको आरोपमा जाहेरी दिएका छन् । 

जाहेरीका आधारमा उनलाई नियन्त्रणमा लिइएको मोरङ प्रहरी प्रमुख एसपी कवित कटुवालले बताए । परिवारका सदस्यले खत्री र युवतीबीच प्रेम सम्बन्ध रहेको तथा आर्थिक हिनामिनाको विषयमा विवाद भएको दाबी गरेका छन् । 

तर, उनीहरूबीचको सम्बन्ध, आर्थिक विवाद र घटनाबीचको सम्बन्धबारे प्रहरीले अनुसन्धान गरिरहेको छ । परिवारको दाबी पुष्टि भइसकेको छैन ।

प्रहरीका अनुसार कल डिटेल्स अध्ययन गर्दा शुक्रबार दिउँसो करिब १ बजे युवतीले खत्रीलाई फोन गरेको देखिएको छ । 

उनीहरूबीच एक मिनेटभन्दा कम समय कुराकानी भएको थियो । फोन संवादपछि खत्री विराटनगर–३ स्थित आफ्नो घरबाट स्कुटर लिएर बाहिरिएका थिए । 

खत्री मृत भेटिएको स्थलभन्दा करीव दुई सय मिटरको दुरीमा प्रहरीले उनले प्रयोग गरेको स्कुटर पनि फेला पारेको जनाएको छ । 

त्यसपछि घर नफर्किएका खत्रीलाई परिवारका सदस्यले खोजी गरेका थिए । 

उनीहरूलाई रेष्टुरेन्टकी क्यासियर युवतीलाई भेट्न गएको हुन सक्ने आशंका भएपछि परिवारले युवतीसँग सम्पर्क गरेका थिए । 

युवतीले आफूले खत्रीसँग नभेटेको र उनी कहाँ गएको भन्ने जानकारी नभएको बताएकी थिइन् । 

परिवारका सदस्यले खत्री र युवतीबीच भेट भएको, भेटका क्रममा विवाद उत्पन्न भएको र त्यसपछि घटना भएको आशंका गर्दै प्रहरीमा जाहेरी दिएका हुन् । 

प्रहरीका अनुसार उनीहरूबीचको सम्बन्ध र घटनाअघिका गतिविधिबारे थप अनुसन्धान भइरहेको छ ।

शुक्रबारदेखि सम्पर्कविहीन भएका खत्री शनिबार दिउँसो करिब ३ बजे केराबारीस्थित जंगलमा मृत अवस्थामा फेला परेका थिए । 

घटनास्थल उनको विराटनगरस्थित घरबाट पूर्वोत्तर दिशामा पर्छ । 

विवाहित खत्रीका श्रीमती, एक छोरा र एक छोरी छन् । अविवाहित युवती विराटनगरमा रहेको पिजफायर रेष्टुरेन्टमा क्यासियरका रूपमा कार्यरत थिइन् ।

खत्री वैदेशिक रोजगारीका क्रममा छ वर्ष जर्मनी बसेर फर्किएका थिए । त्यसपछि पनि आर्थिक अवस्थामा सुधार नभएपछि उनी दुई वर्ष दुबई बसेका थिए । 

दुबईबाट फर्किएपछि उनले विराटनगरको गोल्छा चोक र पिपल चोकमा रेष्टुरेन्ट सञ्चालन गरेका थिए ।