तार चोरीको विवादमा विराटनगरका ब्यवसायी गुप्ताको हत्या भएको खुलासा

सुनसरी । विराटनगरमा पानी तान्ने मोटरको तार चोरी गरेको आरोप लगाउँदै विवाद हुँदा एक ब्यवायीको हत्या भएको घटनामा प्रहरीले तीन जनालाई पक्राउ गरेको छ । 

विराटनगर–६ निवासी ६९ वर्षीय लालजीप्रसाद गुप्ताको हत्या आरोपमा प्रहरीले एक भारतीय नाबालकसहित तीन जनालाई नियन्त्रणमा लिएको हो ।

जिल्ला प्रहरी कार्यालय सुनसरीले बुधबार पत्रकार सम्मेलन गरी घटनाबारे जानकारी दिएको हो । 

प्रहरीका अनुसार पक्राउ पर्नेमा विराटनगर–६ स्वागत चोक घर भएका ३६ वर्षीय अफरोज आलम, भारतका १३ वर्षीय एक नाबालक र नेपालका १६ वर्षीय अर्का नाबालक छन् । 

अफरोज आलम विराटनगर–६ महावीर चोकमा हार्डवेयरको गोदाम सञ्चालन गर्दै आएका व्यक्ति हुन् । प्रहरीले दुवै नाबालकको नाम सार्वजनिक गरेको छैन ।

प्रहरीका अनुसार गुप्ताले आलममाथि विराटनगर–६ स्थित माता इलेक्ट्रिक वर्कसबाट पानी तान्ने मोटरको तार चोरी गरेको आरोप लगाएका थिए । 

सोही विषयमा दुई जनाबीच विवाद भएको र त्यसपछि गुप्तालाइ घरमै बोलाएर कुटपिट गरी हत्या गरिएको प्रारम्भिक अनुसन्धानबाट खुलेको सुनसरी प्रहरी प्रमुख एसपी पुष्पराज मल्लले जानकारी दिए ।

भारतको वाराणसीका स्थायी बासिन्दा गुप्ता करिब ४० वर्षदेखि विराटनगरमा बस्दै आएका थिए । उनले विराटनगर–६ धरान रोडमा लाल ब्याट्री एन्ड सन्स ट्रेडर्स सञ्चालन गर्दै आएका थिए । 

प्रहरीका अनुसार गुप्ताको शव सुनसरीको बर्जु गाउँपालिका–२ भीमपुरस्थित केसलिया खोलाको किनारमा बेवारिसे अवस्थामा फेला परेको थियो । 

कात्तिक ८ गते शुक्रबार अपरान्ह करिब ४ बजेर ४७ मिनेटदेखि सम्पर्कविहीन भएका गुप्ताको शव भोलिपल्ट शनिबार बिहान करिब १० बजे फेला परेको जानकारी स्थानीयबाट प्राप्त भएको प्रहरीले जनाएको छ ।

शव फेला परेको सूचना प्राप्त हुनासाथ प्रहरी टोली घटनास्थल पुगेको थियो । 

घटनास्थलको सुरक्षा तथा अनुसन्धानका लागि प्रहरी अधिकृतसहित तालिम प्राप्त कुकुर र सोको टोलीसमेत परिचालन गरिएको थियो । 

प्रहरीले घटनास्थलको सूक्ष्म निरीक्षण, मुचुल्का र अन्य प्रमाण संकलन गर्दै अनुसन्धान अघि बढाएको जनाएको छ । 

एसपी मल्लका अनुसार प्रहरीले मंगलबार साँझ करिब ५ बजे घटनामा संलग्न रहेको आशंकामा व्यक्तिहरूको पहिचान गरी पक्राउ गरेको हो । 

उनीहरूबाट घटनामा प्रयोग भएको भनिएको जीआई पाइप एक थान, मृतकले प्रयोग गर्ने रेडमी कम्पनीको मोबाइल फोन र शव बोक्न प्रयोग भएको कार्टुनसमेत बरामद गरिएको मल्लले बताए । 

घटनामा संलग्न व्यक्तिहरूको भूमिका, हत्या गर्दाको परिस्थिति र शव सुनसरीको बर्जुसम्म कसरी पु¥याइयो भन्ने विषयमा थप अनुसन्धान भइरहेको प्रहरीले जनाएको छ ।