नेपाल नजिक आइपुग्यो अर्नब चक्रवात, धान भित्र्याउने चटारोमा झरीको त्रास

विराटनगर । धान पाकेर भित्र्याउने समय, त्यसमाथि वर्षाको पूर्वानुमान । बंगालको खाडीमा विकसित चक्रवात ‘अर्नब’ को सम्भावित प्रभावले कोशी प्रदेशमा धानबाली भित्र्याउने तयारीमा रहेका किसानलाई समयमै बाली सुरक्षित गर्नुपर्ने दबाब बढाएको छ । 

जल तथा मौसम विज्ञान विभागले बिहीबार रातिदेखि नेपालमा मौसम प्रभावित हुन सक्ने र शुक्रबार तथा शनिबार कोशीसहितका प्रदेशमा वर्षाको सम्भावना रहेको पूर्वानुमान गरेपछि सरकारी निकायले धान काट्ने र भित्र्याउने काम समयमै सक्न आग्रह गरेका छन् । 

राष्ट्रिय विपद् जोखिम न्यूनीकरण तथा व्यवस्थापन प्राधिकरणले कात्तिक १२ गते बिहीबारअघि नै कृषि कार्य पूरा गर्न अनुरोध गरेको छ । 

कोशीका किसानका लागि चिन्ताको विषय वर्षा हुने सम्भावना मात्रै होइन, पाकेको धान काट्ने, खेतबाट उठाउने र सुरक्षित ठाउँमा सुकाउने कामका लागि उपलब्ध समय पनि हो । 

वर्षा सुरु हुनुअघि बाली भित्र्याउन नसके खेतमा पाकेको धानदेखि काटेर सुकाउन राखिएको धानसम्म प्रभावित हुन सक्छ ।  

चक्रवातको प्रभावलाई ध्यानमा राखेर मोरङ, झापा, सुनसरी, धनकुटासहित कोशीका सबैजसो  जिल्ला प्रशासन कार्यालयले कात्तिक १२ देखि १४ गतेसम्म सतर्क रहन आग्रह गरेका छन् । 

तराईका जिल्ला प्रशासनले धान काट्ने तथा भित्र्याउने काम नगर्न र नगराउन अनुरोध गर्नुका साथै अत्यावश्यकबाहेक यात्रा नगर्न भनेका छ । 

राष्ट्रिय विपद् जोखिम न्यूनीकरण तथा व्यवस्थापन प्राधिकरण र मौसम विभागको विशेष बुलेटिनका आधारमा यस्तो आग्रह गरिएको प्रशासनले जनाएको छ । 

चक्रवात अर्नब भारतको आन्ध्र प्रदेशको तटीय क्षेत्रमा प्रवेश गरेपछि कमजोर हुँदै गएको विवरण सार्वजनिक भएका छन् । 

भारतमा प्रवेश गर्दा यसको निरन्तर हावाको गति प्रतिघण्टा १२५ देखि १३५ किलोमिटर र हावाको झोक्का १५० किलोमिटरसम्म पुगेको थियो । 

यसको बाहिरी वायुमण्डलीय प्रभाव र माथिल्लो वायुमण्डलको प्रणालीसँगको अन्तरक्रियाले नेपालमा वर्षा गराउन सक्ने मौसमविद्हरूको आकलन छ ।

विभागको पूर्वानुमानअनुसार शुक्रबार र शनिबार कोशीका धेरै स्थानमा मध्यम वर्षा तथा केही स्थानमा भारी वर्षा हुन सक्छ । 

उच्च पहाडी तथा हिमाली क्षेत्रमा हिमपातको सम्भावना पनि छ । यस अवधिमा चट्याङ र हावाहुरीको जोखिमसमेत रहेकाले कृषि कार्य जोखिमपूर्ण हुने प्राधिकरणको भनाइ छ । 

मौसम प्रतिकूल हुने पूर्वानुमानले धानबाली भित्र्याउने  तयारीमा रहेका किसानलाई पनि असर पार्न सक्छ । 

पाकेको धान खेतमै रहेको अवस्थामा वर्षा भए कटान प्रभावित हुन सक्छ । 

काटेर खेतमा राखिएको धान भिजेमा गुणस्तरमा असर पर्ने र हावाहुरीले बाली ढलाउने जोखिम रहन्छ । 

कोशीका उच्च पहाडी तथा हिमाली क्षेत्रमा हिमपात भए पदमार्ग र सडक अवरुद्ध हुन सक्छन् । 

हिमआँधीका कारण दृश्यता घट्ने र हिमपहिरोको जोखिम बढ्ने सम्भावना रहेकाले पदयात्री तथा पर्यटकले मौसमको पछिल्लो जानकारी नलिई यात्रा नगर्न जिल्ला प्रशासनहरुले आग्रह गरेका छन् । 

चट्याङ परेको समयमा खुला मैदान, अग्ला रुख तथा बिजुलीका खम्बा आसपास बस्न नहुने र हावाहुरीका बेला कमजोर संरचनाबाट टाढा रहनुपर्ने प्राधिकरणले जनाएको छ । 

स्थानीय तह र सुरक्षा निकायले जोखिममा रहेका बस्तीमा सूचना पु¥याउने तथा आवश्यक परे सुरक्षित स्थानमा सार्ने तयारी गर्नुपर्ने हुन्छ ।

मौसमसम्बन्धी आधिकारिक सूचना नियमित पछ्याउन र स्थानीय प्रशासनको निर्देशन पालना गर्न प्राधिकरणले आग्रह गरेको छ । 

मौसमसम्बन्धी जानकारीका लागि टोल फ्री नम्बर ११५५, विपद् सहायता नम्बर १२३४ र प्रहरी सहायता नम्बर १०० मा सम्पर्क गर्न सकिने प्राधिकरणको सूचनामा उल्लेख गरिएको छ ।