उम्मेदवारको लर्कोले निर्वाचन कमिटीलाई चुनाव गराउनै सकस

विराटनगर । नेकपा एमाले मोरङको जारी १० औं जिल्ला अधिवेशनमा कुल प्रतिनिधि संख्याको एक तिहाई भन्दा बढी संख्याले विभिन्न पदमा उम्मेदवारी दिएपछि निर्वाचन कमिटीलाई चुनाव गराउन सकस परेको छ । सोही सकसलाई टार्न निर्वाचन कमिटीले उम्मेदवारी फिर्ता लिने समयलाई निरन्तर बढाउँदै लगेको छ ।

निर्वाचन कमिटीले दिएको जानकारीअनुसार अध्यक्ष, उपाध्यक्ष, सचिव र २ जना उपसचिवसहितको पदाधिकारीमा हरेक पदमा दुई-दुई जनाको उम्मेदवारी परेको छ । सदस्यमा भने धेरैले उम्मेदवारी  दिएका छन् । १६० जना सदस्य पदका लागि ३३१ जनाले उम्मेदवारी  दिएका हुन् । 

उम्मेदवारहरू धेरै जना भएपछि अहिले एमाले नेताहरू सदस्यहरूमा सर्वसम्मत गर्न पहल गरिरहेका छन् । ‘सबैको उम्मेदवारी कायम रहने हो भने मतपत्र नै १८-२० पानाको बनाउनुपर्ने अवस्था छ’, निर्वाचन कमिटीका एक सदस्यले भने ‘त्यसैले सकेसम्म दुई-तीन पानाको मतपत्र हुने गरी सर्वसम्मत गर्ने प्रयास भइरहेको छ ।’

केन्द्रीय निर्वाचन  कमिटीका सदस्य समीर नेपालले पनि छरितो मतपत्र बनाउनका लागि उम्मेदवारी  फिर्ता गराउने विषयमा लचिलो नीति लिइएको बताए । ‘हामी निर्वाचनका अरु काम पनि गरिरहेका छौं’, उनले भने ‘अन्तिम नामावली प्रकाशनको समयसम्म उम्मेदवारी फिर्ता लिने विषयमा लचिलो नै हुन्छौं ।’

जारी जिल्ला अधिवेशनमा संस्थापन र इतर समूह गरी दुई समूहले प्यानलै बनाई उम्मेदवारी दिएका छन् । प्यानल बनाई उम्मेदवारी दिन नपाइने पार्टी केन्द्रको नीति विपरीत दुवै समूहले उम्मेदवारी दिएका हुन् । दुवै समूहले आ-आफ्नो प्यानलको उम्मेदवारको फोटो राखी सामाजिक सञ्जालमा मत माग्न सुरु गरिसकेका छन् ।

संस्थापन पक्ष राजकुमार ओझा नेतृत्वमा चुनावी मैदानमा होमिँदा इतर पक्ष अजम्बर राईको अगुवाईमा प्रतिष्पर्धामा ओर्लिएका छन्।अध्यक्षका दुई उम्मेदवारमध्ये प्रदेशका पूर्वसांसद  ओझालाई  कोशी प्रदेशबाट प्रतिनिधित्व गर्ने बहुसंख्यक स्थायी कमिटी सदस्यको साथ छ । अध्यक्षमै उम्मेदवार बनेका जिसस मोरङका प्रमुख अजम्बर राईलाई नेता विनोद ढकालको समर्थन छ । ओझाको टिमबाट उपाध्यक्षमा शान्ति लिम्बू, सचिवमा रविन थापा, उपसचिवमा इर्जालाल राजवंशी र शिल्पा निराला कार्कीले उम्मेदवारी दिएका छन् । कार्की विराटनगरकी उपमेयर हुन् । 

त्यस्तै, ढकाल समूहबाट अध्यक्ष अजम्बर राई, उपाध्यक्षमा सागर थापा, सचिवमा सोमराज थापा, उपसचिवमा  सन्तोष वान्तवा र उषा झाले उम्मेदवारी दिएका छन् ।  उषा झा जिसस मोरङकी उपप्रमुख हुन् । एमाले मोरङ जिल्ला कमिटी पदाधिकारीसहित  १६५ सदस्यीय हुनेछ ।