विराटनगर । राष्ट्रिय स्वतन्त्र पार्टी (रास्वपा) को केन्द्रीय अनुशासन आयोगद्वारा कोशी प्रदेशका सभापति राजेश तिमल्सिनाविरुद्ध कारवाही प्रक्रिया अघि बढाउन आइतबार बोलाइएको बैठक कोरम नपुगेपछि बैठक नै रद्द भएको छ । 

मुकुल ढकाललाई पुनःस्थापना गर्नुपर्ने तिमल्सिनाको अभिव्यक्तिपछि आयोगले स्पष्टीकरण माग्दै कोशी प्रदेश कमिटीको बैठक बोलाएको थियो । 

इटहरीको दुर्गा पार्टी प्यालेसमा बोलाइएको बैठकमा नगन्य सदस्य आएपछि बैठक सम्पन्न गर्न आएका केन्द्रीय अनुशासन आयोगका अध्यक्ष भरतमणि देवकोटा रित्तै फर्किएको बुझिएको छ ।

स्रोतका अनुसार, ६२ सदस्यीय प्रदेश कमिटीका केवल १३ सदस्य मात्र बैठकमा उपस्थित थिए । त्यस्तै, पाँच सदस्यीय कार्यसम्पादन समितिका केवल दुई सदस्यहरू उपाध्यक्ष शरिन तामाङ र महामन्त्री लालविक्रम थापामात्र बैठकमा सहभागी भएको बताइएको छ ।

बैठक सुरु गर्न तोकिएको समयभन्दा ४० मिनेट ढिला गरी उपस्थित सदस्यहरूको प्रतिक्षा गरिएको भएपनि आवश्यक कोरम नपुगेपछि बैठक रद्द गर्नुपरेको आयोजकहरूले जनाएका छन् । स्रोतका अनुसार, प्रदेश समिति सदस्यहरूको न्यून उपस्थिति रहेपछि इटहरी नगर समितिका वडा सभापतिहरूलाई बैठकमा बोलाइएको थियो ।

यो घटनाले कोशी प्रदेश कमिटी र रास्वपाभित्रको व्यवस्थापन र आन्तरिक नेतृत्वमा देखिएको चुनौतीलाई उजागर गरेको बताइन्छ । मुकुल ढकालको पदमुक्ति र त्यसपछि उठेका विवादहरूका कारण पार्टीभित्र असन्तुष्टि बढ्दै गएको देखिन्छ ।

रास्वपाले यो घटनाबारे र आगामी कदमका सम्बन्धमा औपचारिक धारणा भने सार्वजनिक गरेको छैन । तर, आइतबारको बैठक रद्द भएपछि तिमल्सिना विरुद्धको कारवाही प्रक्रिया अनिश्चित बनेको भनेको देखिन्छ ।

यो पनि,

डा. मुकुलका पक्षमा उभिए रास्वपा कोशी सभापति तिम्सिना, मुकुल पनि रविप्रति नरम हुँदै