लापरवाहीपुर्वक मोटरसाइकल चलाउँदा हर्क साम्पाङमाथि ट्राफिकको कारबाही

विराटनगर । श्रम संस्कृति पार्टीका अध्यक्ष एवम् प्रतिनिधिसभा सदस्य हर्क साम्पाङलाई ट्राफिक प्रहरीले कारबाही गरेको छ । 

लापरवाहीपूर्वक मोटरसाइकल चलाएको आरोपमा उनी  कारबाहीमा परेका हुन् । ट्राफिक नियमको पालना नगरेको भन्दै प्रहरीले उनलाई जरिवाना गरेको छ । 

सांसद साम्पाङमाथि सवारी तथा यातायात व्यवस्था ऐन, २०४९ को दफा १६४ (१) (ग) बमोजिम कारबाही प्रक्रिया अगाडि बढाइएको प्रहरीले जनाएको छ । 

मोबाइलले भिडिओ खिच्दै बाइक चलाएको देखिएपछि ट्राफिक प्रहरीले उनलाई लापरबाही साथ सवारी चलाएको कसुरमा जरिवाना गरेको हो । 

भिडियो खिच्दै बाइक चलाएको भिडियो उनी स्वयम्ले सामाजिक सञ्जालमा राखेका थिए । त्यसक्रममा दुर्घटनामा परेर उनी घाइतेसमेत भएका थिए । 

कानुनतः पहिलोपटक यस्तो कसुर गर्ने चालकलाई ५ सय रुपैयाँ जरिवाना हुने व्यवस्था छ । 

कोशी प्रदेशस्थित राजमार्ग सुरक्षा तथा ट्राफिक व्यवस्थापन कार्यालयका अनुसार, कारबाहीमा परेका साम्पाङको नाममा ट्राफिक चिट काटिएको छ । 

उक्त मोटरसाइकल खरिद प्रक्रियाको केही प्राविधिक पाटो बाँकी रहेको र सोही आधारमा प्रहरीले शोरुममार्फत कारबाहीको सूचना पुर्याएको हो । 

यसबारे ट्राफिक प्रहरी कार्यालय कोशीका प्रवक्ता प्रहरी नायव उपरीक्षक ‘डीएसपी’ होमप्रसाद अधिकारीले भने, ‘चिट चालकको नाममा काटिए पनि बाइक शोरुमकै नाममा रहेकाले चिट शोरुमलाई दिएका हौं ।’

प्रहरीले  कारबाही भइसकेको र तोकिएको जरिवाना सम्बन्धित व्यक्तिले बुझाउनुपर्ने जनाएको छ । 

सार्वजनिक गुनासो र सडक नियमको कडाइका साथ पालना गराउने उद्देश्यले सो कारबाही गरिएको प्रहरीको भनाइ छ । 

ट्राफिक प्रहरीले आफ्नो आधिकारिक सामाजिक सञ्जालमार्फत समेत सांसद साम्पाङलाई नियम उल्लंघनको कसुरमा कारबाही गरिएको जानकारी सार्वजनिक गरेको छ । उनको तस्वीरसमेत राखेर प्रहरीले यो सूचना गरेको हो ।