ज्यान मुद्दाका फरार तील बहादुर ४५ वर्षपछि समातिए

विराटनगर । जिल्ला प्रहरी कार्यालय इलामले कर्तव्य ज्यान मुद्दाका एक फरार प्रतिवादीलाई ४५ बर्षपछि पक्राउ गरेको छ ।

इलाम जिल्ला अदालतबाट २०३८ जेठ १२ मा भएको फैसला अनुसार १० बर्ष कैद सजाय तोकिएका हाल सन्दकपुर गाउँपालिका–५ का तील बहादुर गुरुङ मंगलबार पक्राउ परेका हुन् ।

पक्राउ परेका गुरुङ अहिले ७६ वर्ष पुगेका छन् ।

जिल्ला प्रहरी कार्यालय इलामका प्रमुख प्रहरी उपरीक्षक एक नारायण कोइरालाले जिल्लाबाटै खटिएको बिशेष टोलिले सन्दकपुर–५ मा लुकिछिपी बसेको अवस्थामा पक्राउ गरी इलाम जिल्ला कारागार चलान गरिएको बताए ।

‘अदालतको अभिलेख अनुसार फरार रहेका व्यक्तिहरू पक्राउ गर्न हामीले विशेष टोली नै परिचालन गरेका छौं’ एसपी कोइरालाले भने, ‘खोजतलास गर्ने टिमले सात दिनको अथक प्रयासबाट पक्राउ गरेको हो ।’