कोशी प्रदेश सभाभित्र बचेका सामग्री पनि चोरीको प्रयास

विराटनगर । जेनजी प्रदर्शनकारीको तोडफोड र आगजनीबाट ध्वस्त बनेको कोशी प्रदेश सभाभित्र गएराती चोर प्रवेश गरेर बचेका सामग्री समेत चार्ने प्रयास गरेको छ । 

‘राती सचिवालय परिसरमा आवाज आएपछि उठेर हेर्दा त चोर आएको रहेछ, सुरुमा त डर पनि लाग्यो, तर पछि भाटा लिएर लखेटें’ सचिवालयका सुरक्षागार्ड पुन्य तिम्सिनाले भने, ‘जलेर ध्वस्त भएको सचिवालयभित्र बिहान हेर्दा दिसा पनि गरिदिएछ ।’

सचिवालयका बचेका केही कोठामा भदौ २४ मा ठुलो संख्यामा प्रवेश गरेका प्रदर्शनकारीले झ्याल ढोका सवै तोडफोड गरेका थिए ।

कम्पाउण्ड वाल भत्काएका कारण सुरक्षा गर्न असहज भएको जनाइएको छ । जसका कारण प्रदेश सभा सचिवालयमा जोगिएका केही सामग्री समेत राती चोरी हुने चुनौति थपिएको प्रदेश सभाका सूचना अधिकारी निरोज ढकालले बताए ।