कोशीमा ८० प्रतिशत उम्मेदवारको जमानत जफत

विराटनगर । प्रतिनिधि सभा सदस्य निर्वाचनमा कोशी प्रदेशका १४ जिल्लामा उम्मेदवारी दिएका ४९५ उम्मेदवारमध्ये ३९९ जनाको जमानत जफत भएको छ । यो संख्या कुल उम्मेदवारको ८० दशमलव ६१ प्रतिशत हो ।

झापा, मोरङ र सुनसरीमा ठुला दलकै उम्मेदवारहरूले जमानत जोगाउन सकेनन् । तराई र शहरी मतदातामाझ लोकप्रिय बनेको राष्ट्रिय स्वतन्त्र पार्टीका उम्मेदवारले भने पहाडी जिल्लामा भने जमानत जफत गराएका छन् ।

प्रतिनिधि सभा निर्वाचनमा कुल सदर मतको कम्तीमा १० प्रतिशत मत प्राप्त गर्न नसक्ने उम्मेदवारको जमानत जफत हुने कानुनी व्यवस्था रहेको छ । 

कोशी प्रदेशमा ठूलो संख्यामा स्वतन्त्र र साना दलका उम्मेदवार उठ्दा धेरैको जमानत जफत भएको छ ।

सबैभन्दा बढी सुनसरीमा १०० जना उम्मेदवारको जमानत जफत भएको छ । ११० उम्मेदवारमध्ये ९० दशमलव ९१ प्रतिशत उम्मेदवारले जमानत जोगाउने गरी आवश्यक मत पाउन सकेनन् ।

सुनसरी १ मा नेपाली कांग्रेसका सुजेन्द्र तामाङ, नेकपा एमालेका टिकाराम लिम्बु र नेपाल कम्युनिस्ट पार्टीका मनोज भट्टराईसहित २१ उम्मेदवारले जमानत जोगाउन सकेनन् । 

सुनसरी २ मा नेकपाकी रामकुमारी चौधरी र नेकपा एमालेका सुजन लामाले जमानत जोगाएनन् ।

सुनसरी ३ मा नेकपाका दुर्गेशकुमार चौधरी र सुनसरी ४ मा महमद महफुज अन्सारीले पनि जमानत जोगाएनन् ।

झापा र मोरङमा पनि ठुलो संख्यामा उम्मेदवारले जमानत गुमाएका छन् । झापामा ९० उम्मेदवारमध्ये ७८ जनाले जमानत जोगाउन सकेनन् । 

झापा १ मा नेकपा एमालेका रामचन्द्र उप्रेती, राप्रपाका हेमराज कार्की, नेकपाका अशेष घिमिरेलगायतको जमानत जफत भएको छ । 

त्यस्तै क्षेत्र नं २ मा राप्रपाका भद्रप्रसाद नेपाल(स्वागत), नेकपाकी धर्मशीला चापागाईसहित १६ जना उम्मेदवारको जमानत जफत भएको जनाइएको छ ।

झापा ३ मा कांग्रेसका राजेन्द्र घिमिरे, एमालेका हरिबहादुर राजवंशी, नेकपाका डिल्लीराम घिमिरेको पनि जमानत जफत भएको छ ।

झापा ४ मा राप्रपाका भक्तिप्रसाद सिटौला, नेकपाका पुरुषोत्तम चुडालसहित १३ जना उम्मेदवारको जमानत जफत भएको छ । झापा ५ मा कांग्रेसकी मन्धरा चिमरिया र राप्रपाका लक्ष्मीप्रसाद संग्रौलाको पनि जमानत जफत भएको निर्वाचन कार्यालयले जनाएको छ ।

मोरङमा ११० उम्मेदवारमध्ये ९१ जनाले जमानत जोगाउन सकेनन् । मोरङ १ मा नेकपाका कुलप्रसाद साम्बा, मोरङ २ चन्द्रवीर राई, मोरङ ३ डा. देउमान सम्बाहाम्फे र ६ मा ओपेन्द्रकुमार रायले जमानत जोगाएनन् ।

एमालेबाट मोरङ ३ का ईरान राई, ४ का जीवन घिमिरे, ५ का मनोजकुमार अग्रवाल र ६ का विनोद ढकालले पनि जमानत जोगाउन सकेनन् । 

मोरङ ५ मा अघिल्लो पटक निर्वाचित सांसद योगेन्द्र मण्डलले समेतको यसपटक जमानत जोगिएन । मोरङका कांग्रेसका भने सबै उम्मेदवारले जमानत जोगाएका छन् ।

यसैबीच, धनकुटामा १७ उम्मेदवारमध्ये १३, संखुवासभामा १६ मध्ये १२, पाँचथरमा १५ मध्ये ११, खोटाङ र ओखलढुंगामा समान १५ मध्ये ११–११ जना उम्मेदवारको जमानत जफत भएको छ ।

ताप्लेजुङमा १३ मध्ये ९, उदयपुरमा ३१ मध्ये २१, इलाममा २७ मध्ये १८, र तेह्रथुममा १२ मध्ये ८ जनाको जमानत जफत भएको निर्वाचन आयोगले जनाएको छ ।

भोजपुरमा भने सवैभन्दा कम उम्मेदवारको जमानत जफत भएको छ । त्यहाँ १२ उम्मेदवारमध्ये ७ जनाको मात्रै जमानत जफत भएको आयोगको तथ्यांकमा उल्लेख छ ।

नेकपाबाट इलाम २ मा ओमबहादुर गुरुङ, संखुवासभामा सरिता थापा, तेह्रथुममा रनध्वज लिम्बु र धनकुटामा धर्मराज पौडेलले जमानत जोगाउन नसकेको जनाइएको छ ।

रास्वपाका चार उम्मेदवारको जमानत जफत

कोशी प्रदेशका १४ जिल्लाका १७ वटा निर्वाचन क्षेत्रमा जित हासिल गरेको रास्वपाले चारवटा जिल्लामा भने जमानत जोगाउन असफल बनेको छ ।

रास्वपाले आफ्नो प्रभाव कम भएका पहाडी जिल्लामा जमानत जोगाउन नसकेको हो ।

रास्वपाबाट ताप्लेजुङमा उम्मेदवार बनेका विरेन्द्र श्रेष्ठ, पाँचथरका महेन्द्र विक्रम थाम्सुहाङ, सोलुखुम्बुका ऋषिधन थुलुङ राई र खोटाङमा रुद्र गिरीले १० प्रतिशत मत प्राप्त गर्न नसक्दा जमानत जफत भएको छ ।