मौसम बिग्रँदा नेपाली आकाशमा छैनन् जहाज, सवै उडान प्रभावित

विराटनगर । देशका विभिन्न भागमा मौसममा व्यापक गडबढी भएसँगै हवाई उडान पूर्णरुपमा प्रभावित भएको छ । ११९ किमि प्रतिघण्टासम्मको हावाहुरीको चेतावनीबीच राजधानी काठमाडौंमा असिनापानी परेपछि अहिले नेपाली आकाश जहाज उडेका छैनन् ।

मौसममा आएको अचानक परिवर्तनका कारण त्रिभुवन अन्तर्राष्ट्रिय विमानस्थलसहित देशभरका कुनैपनि आन्तरिक विमानस्थलबाट जहाज उडेका छैनन् । सवै आन्तरिक तथा अन्तर्राष्ट्रिय उडान प्रभावित भएका छन् ।

जहाज उडान अवतरणका लागि हावाको गति र कम भिजिविलिटी प्रमुख चुनौति बनेको जनाइएको छ ।

जसका कारण उडान सुरक्षामा जोखिम बढेको भन्दै त्रिभुवन विमानस्थलमा कुनैपनि जहाजहरूलाई अवतरण भएका छैनन् । विभिन्न ठाउँबाट आएका जहाजहरु डाइभर्ट भइरहेको विमानस्थल स्रोतले जनाएको छ ।

जल तथा मौसम विज्ञान विभागले देशका तराई तथा पहाडी क्षेत्रहरूमा तीव्र हावाहुरी, मेघगर्जन र असिनापानीको सम्भावना औंल्याउँदै सतर्कता अपनाउन आग्रह गरेको छ । विशेषगरी कोशी प्रदेशसहितका क्षेत्रमा हावाहुरीको जोखिम उच्च रहेको बताइएको छ ।

विमानस्थल स्रोतका अनुसार खराब मौसमका कारण केही समय नेपाली आकाशमा कुनै पनि जहाज नउड्ने अवस्था सिर्जना भएको हो । यसले यात्रुहरूलाई विमानस्थलमै रोकिनु पर्ने अवस्था आएको छ । उडान तालिकामा समेत अवरोध पुगेको छ ।

मौसममा सुधार आएपछि मात्रै उडान सञ्चालन हुने जनाइएको छ । यसबीच सम्बन्धित निकायहरूले सर्वसाधारणलाई आवश्यक सावधानी अपनाउन तथा अत्यावश्यक बाहेक यात्रा नगर्न आग्रह गरेका छन् ।