मोरङ कारागारमा प्रवेश गरेका दुई युवतीको भित्री बस्त्रबाट ४८० थान लागुऔषध बरामद

विराटनगर । विराटनगरस्थित मोरङ जिल्ला कारागारमा प्रवेश गर्ने क्रममा दुई युवतीले भित्री बस्त्रमा लुकाएर ल्याएको ४८० थान लागुऔषध बरामद भएको छ ।

विराटनगर महानगरपालिका–८ हाटखोलास्थित कारागार कार्यालयको मुख्य प्रवेशद्वारमा नियमित जाँच गर्ने क्रममा सुनसरीको धरान उपमहानगरपालिका–११ निवासी मेलिना तामाङ र पूर्णिमा तामाङबाट लागुऔषध बरामद भएको हो । प्रहरीका अनुसार उनीहरु दिदीबहिनी हुन् ।

कारागारको मुख्य प्रवेशद्वारमा बिहीबार दिउँसो साढे १२ बजे जाँच गर्ने क्रममा उनीहरूले भित्री वस्त्रमा प्रयोग हुने प्याडभित्र लुकाएर ल्याएको अवस्थामा हरियो रङका २४० थान र सुन्तला रङका २४० थान ट्याब्लेट फेला परेको प्रहरीले जनाएको छ ।

बरामद लागुऔषधसहित दुवै महिलालाई आवश्यक कारबाहीका लागि दिउँसो करीव १ बजे कारागारमा खटिएको नेपाल प्रहरीको टोलीलाई बुझाइएको जनाइएको छ ।