सभापति लिम्बुको संयोजकत्वमा मोरङ कांग्रेसले बनायो ५०१ सदस्यीय निर्वाचन परिचालन समिति

विराटनगर । आगामी प्रतिनिधि सभा निर्वाचनका लागि नेपाली कांग्रेस मोरङ जिल्ला कार्यसमितिले ५०१ सदस्यीय निर्वाचन परिचालन समिति गठन गरेको छ ।

सभापति डिगबहादुर लिम्बूको अध्यक्षतामा सोमबार पार्टी कार्यालयमा बसेको बैठकले सभापति लिम्बूकै संयोजकत्वमा निर्वाचन परिचालन समिति गठन गरेको जिल्ला कार्यसमितिका सहसचिव एवं प्रवक्ता भुवनेश्वर मण्डलले जानकारी दिए ।

निर्वाचन परिचालन समितिमा मोरङ जिल्ला कार्यसमिति, महासमिति सदस्यहरू, महाधिवेशन प्रतिनिधिहरू, प्रदेश निर्वाचन क्षेत्रका क्षेत्रीय सभापतिहरू, पालिका सभापति, भ्रातृ संघका सभापतिहरू रहने जनाइएको छ ।

बैठकले जिल्ला उपसभापति भक्तिनाथ माझीको संयोजकत्वमा १५ सदस्यीय अनुगमन समितिसमेत गठन गरेको छ । उक्त समितिले चुनाव परिचालनका क्रममा देखिएका कमीकमजोरी पहिचान गर्ने र कार्यकर्ता परिचालनको निगरानी गर्ने जनाइएको छ ।

सभापति लिम्बुको अध्यक्षतामा बसेको उक्त बैठकले भर्खरै सम्पन्न भएको कांग्रेसको विशेष महाधिवेशनबाट निर्वाचित केन्द्रीय सभापति गगन थापासहितका पदाधिकारीहरूलाई स्वागत गर्ने निर्णय गरेको प्रवक्ता मण्डलले बताए ।

उनले कांग्रेस महामन्त्री एवं मोरङ क्षेत्र नम्बर ४ का प्रतिनिधिसभा सदस्यका उम्मेदवार गुरुराज घिमिरेसहित मोरङ जिल्लाबाट निर्वाचित केन्द्रीय सदस्यहरू र भर्खरै कोशी प्रदेश सरकारको मन्त्रीमा नियुक्त भएका भीम पराजुली, मानबहादुर लिम्बू र शोभा चेम्जोङलाई बधाईसमेत ज्ञापन गरेको जानकारी दिए ।