गछिया गोल्डकपको आय–व्यय सार्वजनिक

सुन्दरहरैंचा । मोरङको सुन्दरहरैंचा–३ स्थित गच्छिया युवा समाजले आयोजना गरेको अन्तर्राष्ट्रिय आमन्त्रण एनी प्रथम गछिया गोल्डकप २०८२ को आय–व्यय सार्वजनिक गरेको छ । 

शनिबार गछियामा आयोजित कार्यक्रममा प्रतियोगिताको आर्थिक विवरण सार्वजनिक गरिएको हो ।

आयोजकका अनुसार विभिन्न संघसंस्था, शिक्षा साझेदार, प्रायोजक, स्थानीय निकाय, टिकट बिक्री तथा सिजनल पासमार्फत ५० लाख २५ हजार ३ सय ३८ रुपैयाँ आम्दानी भएको छ । 

प्रतियोगिता सञ्चालन तथा व्यवस्थापनमा ४२ लाख ५७ हजार ३ सय ७० रुपैयाँ खर्च भएको तथा ७ लाख ६ हजार रुपैया उठ्न बाँकी रहेको जानकारी दिइयो । 

कार्यक्रममा बोल्दै खेल संयोजक प्रह्लाद थोप्राले पहिलो संस्करण अपेक्षाभन्दा सफल भएको बताए । 

स्थानीय खेलप्रेमी, सहयोगी संस्था, प्रायोजक, स्थानीय तह, व्यवसायी तथा दर्शकको साथले प्रतियोगिता सफलतापूर्वक सम्पन्न गर्न सम्भव भएको उनले उल्लेख गरे ।

गच्छिया युवा समाजका अध्यक्ष सरोज दाहालले गोल्डकपले गच्छियाको पहिचान स्थापित गर्न महत्वपूर्ण भूमिका खेलेको बताए । 

गत मंसिर १५ गतेदेखि सञ्चालन भएको गोल्डकपले स्थानीयस्तरमा मात्रै नभई प्रदेशकै खेलकुद वृत्तमा चर्चा बटुलेको थियो ।

आयोजकले आगामी संस्करणमा थप विदेशी टोली सहभागी गराउने, पुरस्कार राशि वृद्धि गर्ने तथा दर्शकमैत्री व्यवस्थापनलाई थप प्रभावकारी बनाउने योजना रहेको जनाएको छ ।