बाढी प्रभावितका लागि अरनिको कलेजको १० लाखभन्दा बढी सहयोग

विराटनगर । विराटनगर-१० तिनटोलियास्थित अरनिको कलेजले प्रधानमन्त्री दैवी प्रकोप उद्धार कोषमा जम्मा हुने गरी  १० लाख १ हजार १ सय १ रुपैयाँ सहयोग गरेको छ ।

कलेजले बुधबार उच्च शिक्षालय तथा माध्यमिक विद्यालय संघ नेपाल (हिसान) मोरङमार्फत उक्त रकम भोटेकोशी बाढीबाट प्रभावित परिवारको उद्धार तथा राहतका लागि  हस्तान्तरण गरेको हो । कलेज परिसरमा आयोजित कार्यक्रममा कलेजका प्राचार्य राजेश कार्की तथा सञ्चालकहरूले हिसान मोरङका अध्यक्ष अमित ढकाल र कोशी प्रदेश सचिव दिपेश बास्तोलालाई उक्त रकमबराबरको चेक हस्तान्तरण गरेका छन् ।

चेक हस्तान्तरण कार्यक्रममा कलेजका सञ्चालक भरतराज दाहाल, निलमकुमार अधिकारी, विकास खनाल, विलास लुइँटेल, डा. भविन्द्र निरौला, लक्ष्मीप्रसाद अधिकारी र शैलेशकुमार झासहितको उपस्थिति थियो । बाढी तथा प्राकृतिक विपत्तिबाट प्रभावित परिवारलाई तत्काल राहत उपलब्ध गराउन केही भए पनि सहयोग पुगोस् भन्ने उद्देश्यले रकम प्रदान गरिएको प्राचार्य कार्कीले बताए । विपत्तिका बेला संस्थागत सामाजिक उत्तरदायित्वअन्तर्गत कलेजले सहयोग गरेको उनको भनाइ छ ।

विराटनगरको शैक्षिक क्षेत्रमा विज्ञान शिक्षाका लागि स्थापित पहिचान बनाएको अरनिको कलेजले शैक्षिक गतिविधिसँगै सामाजिक उत्तरदायित्वलाई पनि प्राथमिकतामा राख्दै आएको छ । कलेजले आर्थिक अवस्था कमजोर भएका तथा जेहेन्दार विद्यार्थीलाई अध्ययनको अवसर उपलब्ध गराउन छात्रवृत्ति तथा शुल्क छुटका कार्यक्रम पनि सञ्चालन गर्दै आएको छ ।

शिक्षालाई केवल कक्षाकोठाभित्र सीमित नराखी विद्यार्थीलाई सामाजिक जिम्मेवारी र समुदायप्रतिको दायित्वबोध गराउने प्रयास पनि कलेजले गर्दै आएको छ । यही सामाजिक उत्तरदायित्वको निरन्तरताका रूपमा अहिले बाढी प्रभावितका लागि आर्थिक सहयोग गरिएको प्राचार्य कार्कीले बताए । भोटेकोशी क्षेत्रमा आएको बाढीबाट ठूलो जनधनको क्षति भएपछि प्रभावितको उद्धार, राहत तथा पुनःस्थापनाका लागि विभिन्न क्षेत्रबाट सहयोग जुटिरहेको छ । कोशी प्रदेशको राजधानी विराटनगरसहित प्रदेशका विभिन्न जिल्ला तथा स्थानीय तहबाट आर्थिक सहयोग, खाद्यान्न र आवश्यक सामग्री पठाउने क्रम जारी छ ।

सरकारी निकायसँगै निजी क्षेत्र, उद्योगी-व्यवसायी, शैक्षिक संस्था तथा विभिन्न संघसंस्थाले राहत तथा उद्धारमा सहयोग परिचालन गरिरहेका छन् । बाढीले प्रभावित नागरिकलाई तत्काल राहतसँगै पुनःस्थापनाको आवश्यकता बढिरहेका बेला शैक्षिक संस्थाबाट भएको यस्तो सहयोगले विपत्तिमा संस्थागत सामाजिक उत्तरदायित्वको भूमिकालाई समेत थप बलियो बनाएको छ ।