सरकारको अभिव्यक्तिविरुद्ध काठमाडौंमा श्रम संस्कृति पार्टीको खबरदारी

विराटनगर । प्रधानमन्त्री बालेन्द्र शाह (बालेन) ले संसदमा दिएको अभिव्यक्तिप्रति आपत्ति जनाउँदै श्रम संस्कृति पार्टीले शनिबार काठमाडौंको माइतीघरमा खबरदारी सभा आयोजना गरेको छ । 

यसअघि कोशी प्रदेशका विभिन्न जिल्लामा विरोध प्रदर्शन गरेको पार्टीले राजधानीमा पनि आन्दोलनलाई निरन्तरता दिएको हो ।

प्रधानमन्त्री शाहले संसदमा सांसदहरूको प्रश्नको जवाफ दिने क्रममा ‘भारतले नेपालको मात्र होइन, नेपालले पनि भारतको जग्गा मिचेको छ’ भन्ने अभिव्यक्ति दिएपछि विवाद उत्पन्न भएको थियो । 

उक्त भनाइलाई श्रम संस्कृति पार्टीले ‘तथ्यहीन र राष्ट्रघाती’ भन्दै विरोध जनाएको छ ।

पार्टीका कोशी प्रदेश अध्यक्ष प्रताप राईले प्रधानमन्त्रीको अभिव्यक्तिले नेपालको सार्वभौमिकता र राष्ट्रिय हितमाथि आघात पु¥याएको दाबी गर्दै सार्वजनिक रूपमा माफी माग्नुपर्ने माग गरे । 

उनले अभिव्यक्ति नसच्याइए आन्दोलन थप सशक्त बनाइने चेतावनी दिए ।

पार्टीका नेता अमीर राईले पनि प्रधानमन्त्रीको भनाइले देशको प्रतिष्ठा र कूटनीतिक सम्बन्धमा नकारात्मक असर पार्न सक्ने भन्दै विरोध प्रदर्शनमा उत्रिनुपरेको बताए । 

आन्दोलनकारीहरूले संसदको अभिलेखबाट उक्त अभिव्यक्ति हटाउन र प्रधानमन्त्रीले माफी माग्नुपर्ने माग राखेका छन् ।

आन्दोलनमा सहभागीहरूले ‘बालेन सरकार राजीनामा दे’ लगायतका नारासमेत लगाएका थिए । 

प्रधानमन्त्रीको उक्त अभिव्यक्तिलाई लिएर राजनीतिक वृत्तमा व्यापक बहस जारी छ ।