उद्योगी–व्यवसायीलाई त्रसित नबनाऊ : यादव

विराटनगर । जनता समाजवादी पार्टी नेपालका केन्द्रीय कार्यकारिणी सदस्य जयराम यादवले प्रमाण र अनुसन्धानबिनै उद्योगी, व्यापारी तथा सर्वसाधारणलाई धरपकड गरेर त्रसित बनाउने काम रोक्न सरकारसँग आग्रह गरेका छन् । 

उद्घोष  दैनिकको २२ औँ वार्षिकोत्सवका अवसरमा विराटनगरमा आयोजित कार्यक्रममा बोल्दै यादवले राज्यले नागरिकको सुरक्षा र अधिकार सुनिश्चित गर्नुपर्ने बताए । 

‘अहिले दुईतिहाइ नजिकको सरकार छ । देशमा उद्योगी, व्यापारी र पब्लिकलाई सुरक्षा दिनुको सट्टा बिना पुख्ता प्रमाण र अनुसन्धान धरपकड गर्ने र त्रसित बनाउने काम नहोस्,’ उनले भने । 

यादवले  प्रमाण प्राप्त नगरी जथाभावी धरपकड गर्ने प्रवृत्तिले मुलुकको आर्थिक तथा सामाजिक विकासलाई समेत प्रभावित पार्ने बताए । 

नेपालको संविधान, अधिकार र राज्यको संरचनाका विषयमा बहस भइरहे पनि विगतका कतिपय संवैधानिक तथा राजनीतिक माग अझै सम्बोधन हुन बाँकी रहेको उनले बताए ।

यादवले मुलुकमा बहुसांस्कृतिक, धार्मिक र सामाजिक सद्भाव कायम राख्न सरकार गम्भीर हुनुपर्नेमा जोड दिए । 

‘देशमा बहुसांस्कृतिक, धार्मिक र सामाजिक सद्भाव कायम राख्न सरकार गम्भीर हुनुपर्छ,’ उनले भने ।