महेन्द्र मोरङ क्याम्पसका उपप्राध्यापक अनिल अधिकारीलाई 'विद्यावारिधि' को उपाधि

विराटनगर । महेन्द्र मोरङ आदर्श बहुमुखी क्याम्पस, विराटनगरका नेपाली विषयका उपप्राध्यापक अनिल अधिकारीले विद्यावारिधि (पीएचडी) को उपाधि हासिल गरेका छन् ।

त्रिभुवन विश्वविद्यालय, मानविकी तथा सामाजिक शास्त्र संकाय अन्तर्गतको डीनको कार्यालयले अधिकारीलाई सो उपाधि प्रदान गरेको हो ।

अधिकारीले नेपाली विषयमा "नेपाली कवितामा विधाभञ्जन" शीर्षकमा आफ्नो शोध प्रबन्ध (डिसर्टेसन) तयार पारेका थिए ।

उनको शोध कार्यलाई त्रिभुवन विश्वविद्यालयले स्वीकृत गर्दै  २०८२ चैत ५ मा विद्यावारिधिको उपाधि प्रदान गर्ने निर्णय गरेको थियाे ।

त्रिभुवन विश्वविद्यालयका डीन प्रा.डा डुबीनन्द ढकालद्वारा  साेमबार (२०८३ वैशाख १५ गते )हस्ताक्षरित प्रमाणपत्र अनुसार अधिकारीले विद्यावारिधिका लागि आवश्यक सम्पूर्ण प्रक्रिया सफलतापूर्वक पूरा गरेका छन् ।

लामो समयदेखि प्राध्यापन र साहित्यिक अनुसन्धानमा सक्रिय अधिकारीले प्राप्त गरेकाे यो प्राज्ञिक सफलताले महेन्द्र मोरङ क्याम्पस र समग्र विराटनगरको शैक्षिक गरिमालाई थप उचाई दिएको  भन्दै प्राज्ञिक वर्गले  प्रश‌सा गरेका  छन् ।

उनको यो उपलब्धिप्रति सहकर्मी प्राध्यापक, विद्यार्थी तथा शुभचिन्तकहरूले बधाई एवं शुभकामना व्यक्त गरिरहेका छन् ।