रुपेशलाई १५ लाखमा भित्राउँदै विराटनगर किंग्सले बलियो बनायो टोली

विराटनगर । नेपाल प्रिमियर लिग (एनपीएल) को तेस्रो संस्करणका लागि सम्पन्न मिनी अक्सनबाट विराटनगर किंग्सले आफ्नो टोलीलाई थप सन्तुलित र प्रतिस्पर्धी बनाएको छ । 

सोमबार काठमाडौंमा सम्पन्न अक्सनमा १५५ खेलाडीमध्ये ५२ खेलाडी आठ टोलीमा बिक्री हुँदा विराटनगरले सात नयाँ खेलाडी अनुबन्ध गरेको हो ।

सन्दीप लामिछाने मार्की प्लेयर रहेको विराटनगर किंग्सले युवा खेलाडी रुपेश कुमार सिंहलाई अक्सनको सबैभन्दा बढी १५ लाख रुपैयाँमा अनुबन्ध गर्न सफल भएको छ । 

रुपेशका लागि विराटनगरसँगै पोखरा एभेन्जर्स, चितवन राइनोज र सुदूरपश्चिम रोयल्सले अधिकतम मूल्यमा बोली लगाएका थिए । अन्ततः गोला प्रथाका आधारमा गरिएको छनोटमा विराटनगरले उनलाई आफ्नो टोलीमा भित्र्याउन सफल भएको हो ।

रुपेशसँगै विराटनगरले नरेन साउदलाई ५ लाख रुपैयाँ, दिलसाद अलीलाई ५ लाख रुपैयाँ, सुजन थपलियालाई ४ लाख २५ हजार रुपैयाँ, अपराजित पौडेललाई २ लाख रुपैयाँ, प्रतिक श्रेष्ठलाई २ लाख रुपैयाँ तथा इम्रान शेखलाई २ लाख रुपैयाँमा अनुबन्ध गरेको जनाइएको छ ।

यसअघि विराटनगरले आफ्नो मुख्य टिम संरचनाभित्र मार्की सन्दीप लामिछानेसहित लोकेश बम, बसिर अहमद, नारायण जोशी, प्रतिस जिसी र सुभाष भण्डारीलाई रिटेन गरिसकेको छ । 

अक्सनबाट आएका नयाँ खेलाडीसँगै टोलीले ब्याटिङ, बलिङ र अलराउन्डमा टिम थप मजबुत बनेको दाबी गरिएको छ ।

एनपीएलको तेस्रो संस्करणलाई लक्षित गर्दै विराटनगरले अनुभवी र युवा खेलाडीको संयोजनमा टोली निर्माण गरेको जनाएको छ । 

सोमबार सम्पन्न मिनी अक्सनबाट सबै टोलीले आवश्यकताअनुसार टिमभित्रको रिक्तता पुरा गरेको बताएका छन् । विराटनगर किंग्सले पनि अक्सनमार्फत सात खेलाडी थप्दै आफ्नो टोलीलाई लगभग पूर्णता दिएको जनाएको छ ।