आज विश्वासको मत लिंदै कोशीका मुख्यमन्त्री कार्की

विराटनगर । कोशीका मुख्यमन्त्री हिक्मत कार्कीले सोमबार प्रदेशसभाबाट विश्वासको मत लिने भएका छन् ।

नेपाली कांग्रेसले सरकारलाई दिएको समर्थन फिर्ता लिएपछि मुख्यमन्त्री कार्कीले पुनः विश्वासको मत लिनुपर्ने भएको हो । कार्कीले मुख्यमन्त्रीका रूपमा विश्वासको मत लिन लागेको तेस्रो पटक हो । 

कांग्रेसले समर्थन फिर्ता लिएसँगै संवैधानिक व्यवस्थाअनुसार मुख्यमन्त्री कार्कीले प्रदेशसभाबाट पुनः विश्वासको मत लिनुपर्ने अवस्था बनेको हो । त्यसका लागि प्रदेशसभा सचिवालयमा आवश्यक पत्रसमेत दर्ता भइसकेको छ ।

कोशीमा एमाले र नेपाली कम्युनिष्ट पार्टीबीच बनेको सत्ता समीकरणमा रहेका सांसद संख्या ५७ छ । ९३ सदस्यीय प्रदेशसभामा कायम संख्या ९२ छ । कोशीमा  एमालेका ४० र नेकपाका  १७ सासद छन् । 

प्रदेशसभामा कांग्रेसका २९, राष्ट्रिय प्रजातन्त्र पार्टी (राप्रपा) का सभामुखसहित ५ र जनता समाजवादी पार्टी नेपाल का १ सांसद छन् । कांग्रेसले सरकारलाई दिएको समर्थन भदौ ३ मा फिर्ता लिएको थियो ।