हरिनगर र देवानगञ्ज गाउँपालिका भरी निषेधज्ञा जारी, पाँच जनाभन्दा बढी भेला हुन रोक

विराटनगर । जिल्ला प्रशासन कार्यालय सुनसरीले हरिनगर गाउँपालिका र देवानगञ्ज गाउँपालिकाको सम्पूर्ण क्षेत्रमा निषेध आदेश जारी गरेको छ ।

प्रमुख जिल्ला अधिकारी इश्वरी प्रसाद अर्यालले स्थानीय प्रशासन ऐन, २०२८ को दफा ६ को उपदफा ३(क) बमोजिम मंगलबार विहान ७ बजेदेखि साँझ ७ बजेसम्म लागू हुने गरी निषेध आदेश जारी गरेका हुन् ।

जारी आदेशअनुसार निषेध अवधिमा एकै स्थानमा पाँच जनाभन्दा बढी मानिस भेला हुन नपाइने उल्लेख छ । प्रशासनले आदेशको उल्लङ्घन गर्ने व्यक्तिलाई सोही ऐनबमोजिम पाँच हजार रुपैयाँसम्म जरिवाना र एक महिनासम्म कैद हुन सक्ने चेतावनी दिएको छ ।

जिल्ला प्रशासन कार्यालयका अनुसार निषेध आदेश हरिनगर गाउँपालिकाको सम्पूर्ण क्षेत्र तथा देवानगञ्ज गाउँपालिकाको सम्पूर्ण क्षेत्रमा लागू हुनेछ ।

स्थानीय क्षेत्रमा पछिल्लो समय उत्पन्न तनावलाई मध्यनजर गर्दै शान्ति–सुरक्षा कायम राख्न उक्त निर्णय गरिएको प्रशासनले जनाएको छ ।