मन्त्री पराजुलीले अभिनय गरेको नेपाली छठ गीत सार्वजनिक

विराटनगर । कोशी प्रदेशका पर्यटन,वन तथा वातावरण मन्त्री भीम पराजुलीको मुख्य भूमिका रहेको नेपाली छठ गीत सार्वजनिक भएको छ । 

मन्त्री पराजुलीसहित उनकी धर्मपत्नी रञ्जिता पराजुलीको मुख्य भूमिका रहेको सो गीत चैते छठको अवसर पारेर मैथिली अनलाइनको युट्युब च्यानलमा सार्वजनिक भएको हो । 

धर्मकर्ममा बिशेष अभिरुचि लिने पराजुली बर्षौंदेखि छठ पर्व मान्दै आएका छन् । 

छठ पर्वका बेला उनी निराहार व्रत बसेर घस्रँदै विराटनगरस्थित निवासबाट सिंघिया खोलाको घाटसम्म दण्ड प्रणाम गर्दै पुग्ने गरेका छन् । 

दशकौं देखिको आफ्नो छठ पर्वप्रतिको आस्था देखेर निर्माण पक्षले गीतमा अभियन गर्न आग्रह गरेपछि आफू समय मिलाएर पत्नी सहित सुटिङमा सहभागी भएको उनले बताए ।

मन्त्री पराजुलीले अभियन गरेको ‘माता कल्याणी तिमी हौ मिथिलेश्वरी,जगतको कल्याण गर छैठ परमेश्वरी’ बोलको गीतको विराटनगरका सञ्चारकर्मी नवीन कर्णले रचना गरेका छन् । शैलेन्द्र विश्वकर्माले संगीत भरेका छन् । 

गीतमा गायक सुमित खड्का र सानुमैंया यादवले स्वर दिएका छन् । गीतको छायांकन केहिदिन अघि विराटनगरको तीनपैनी पूर्वटोलको सिंघिया घाटमा भएको थियो ।