९० लाख बढीको फर्सीको बियाँ बरामद

विराटनगर । जिल्ला प्रहरी कार्यालय रौतहटले ९० लाख १६ हजार मूल्य बराबरको फर्सीको बियाँ बरामद गरेको छ । 

नेपालबाट भारततर्फ निकासी गर्न लुकाएर राखेको ठाउँबाट जिप्रका रौतहटले फर्सीको बियाँ बरामद गरेको हो ।

जिल्ला प्रहरी कार्यालय रौतहटका सूचना अधिकारीसमेत रहेका प्रहरी नायव उपरीक्षक बसन्त गौतमका अनुसार ३ सय २२ बोरा अर्थात् जम्मा १२ हजार ८ सय ८० किलोग्राम फर्सीको बियाँ वरामद गरेको हो । 

जिल्ला प्रहरी कार्यालय रौतहट र सशस्त्र प्रहरीको संयुक्त टोलीले त्रिपालले छोपेर राखेको अवस्थामा रहेको फर्सीको बियाँ बरामद गरेको प्रहरीले जनाएको छ । 

प्रहरीले फर्सीको बियाँ प्रतिबोरा २८ हजार रुपैयाँका दरले ९० लाख १६ हजार पर्ने अनुमान गरेको जनाएको छ ।

त्यस्तै सो बियाँहरुलाई नियन्त्रणमा लिने क्रममा अश्रुग्यास समेत प्रहार गर्नुपरेको जिप्रका रौतहटले जनाएको छ । 

ती बियाँका बोराहरुलाई नियन्त्रणमा लिन खोज्दा स्थानीय वसिन्दाले ढुंगामुढा हानेर झडपको अवस्था सिर्जना हुँदा अश्रुग्यास प्रहार गर्नु परेको हो । 

सो झडपमा परी ६ जना घाइते भएको प्रहरीले बताएको छ । तीन जना स्थानीय अवरोधकर्ता र तीन जना प्रहरी गरी ६ जना घाइते भएको प्रहरीले जनाएको हो । साथै ती नियन्त्रणमा लिइएका फर्सीका बियाँहरु भन्सार कार्यालयमा बुझाएको प्रहरीले जनाएको छ । 

यसअघि मधेश प्रदेशको सिरहा जिल्लाबाट समेत प्रहरीले ११ लाख भन्दा बढीको फर्सीको बियाँ बरामद गरेको जिल्ला प्रहरी कार्यालय सिरहाले जनाएको छ ।