आर्या न्युरोमा  दुर्बिन प्रविधिबाट मेरुदण्डको शल्यक्रिया सुरु

विराटनगर । मेरुदण्ड सम्बन्धी रोगहरूको उपचारलाई थप आधुनिक, सुरक्षित तथा प्रभावकारी बनाउने उद्देश्यले विराटनगरस्थित आर्या न्युरो अस्पतालले दुर्बिन प्रविधिबाट मेरुदण्डको शल्यक्रिया सेवा सुरु गरेको छ ।

अस्पतालले पछिल्लो समय विश्वमा प्रचलित ‘यूभीई प्रविधि भित्र्याएको हो । यस प्रविधिमा विशेष क्यामेरा (एन्डोस्कोप) र सूक्ष्म शल्य उपकरणको प्रयोग गरी मेरुदण्ड (स्पाइन) को जटिल शल्यक्रिया गरिन्छ ।

अस्पतालका वरिष्ठ न्यूरो सर्जन डा. पंकजराज नेपालका अनुसार यो प्रविधि मेरुदण्डको उपचारमा निकै प्रभावकारी र बिरामीमैत्री छ । 

डा. नेपाल भन्छन्, ‘यूभीई प्रविधिमा हामी दुईवटा साना (करिब ८ एमएमका) प्वाल बनाएर दुर्बिन छिराउँछौं । यसको माध्यमबाट मेरुदण्डमा नसा च्यापिएको ठाउँमा पुगेर त्यसलाई रिलिज गरिन्छ । यो निकै विकसित प्रविधि हो, जसमा म्याग्निफिकेसन (दृश्यलाई ठूलो पारेर हेर्ने क्षमता) धेरै राम्रो हुने भएकोले शल्यक्रिया अत्यन्तै सुरक्षित हुन्छ ।’

परम्परागत खुला शल्यक्रियाको तुलनामा यस प्रविधिका धेरै फाइदाहरू छन् । डा. नेपालका अनुसार यो विधिबाट शल्यक्रिया गर्दा घाउ सानो हुने, रक्तस्राव कम हुने र संक्रमणको जोखिम न्यून हुन्छ । 

उनी थप्छन््, ‘यसबाट बिरामीलाई निको निकै छिटो हुन्छ । शल्यक्रिया गरेको १–२ दिनमै बिरामी घर जान सक्छन् र चाँडै हिंडडुल गर्न सक्षम हुन्छन् ।’

विशेष गरी डिस्क खस्किने, साइटिका, नसामा दबाब पर्ने समस्या तथा मेरुदण्डका विभिन्न रोगहरूको उपचारमा एन्डोस्कोपिक स्पाइन सर्जरी प्रभावकारी विकल्पका रूपमा स्थापित भएको छ ।

आर्या न्युरोले यस सेवाको सुरुवातसँगै कोशी प्रदेशलगायत देशभरका बिरामीहरूलाई विश्वस्तरीय स्पाइन उपचार सेवा स्थानीयस्तरमै उपलब्ध गराउने विश्वास व्यक्त गरेको छ । 

आधुनिक प्रविधि, अनुभवी विशेषज्ञ चिकित्सक र गुणस्तरीय सेवामार्फत आर्या न्युरोलाई न्यूरो तथा स्पाइन उपचारको अग्रणी केन्द्रका रूपमा विकास गर्ने लक्ष्य राखिएको अस्पताल प्रशासनले जनाएको छ ।

स्वास्थ्य क्षेत्रमा भित्रिएका नवीनतम प्रविधिहरूलाई आत्मसात गर्दै बिरामीलाई सहज, सुरक्षित र भरपर्दो उपचार सेवा प्रदान गर्ने आफ्नो अभियानलाई निरन्तरता दिने अस्पतालले प्रतिबद्धता जनाएको छ ।