ओलीको शर्त मान्नेगरी कोशीमा हिक्मत कार्कीकै निरन्तरता

विराटनगर । नेकपा एमालेका अध्यक्ष केपी शर्मा ओली र कोशीका मुख्यमन्त्री हिक्मतकुमार कार्की दुवै आ–आफ्नो अडानबाट एक–एक कदम पछि हट्ने गरी गुण्डु छलफलले मध्यमार्गी निकास निकालेको छ । 

केही दिनअघिसम्म कोशीका मुख्यमन्त्री कार्कीलाई तत्काल राजीनामा दिन दबाब दिइरहेका ओलीले चाहेका बेला फिर्ता हुन कार्कीलाई राजी गराएका छन् । 

ओली निवासमा बुधबार भएको छलफलपछि ओलीले कार्कीलाई निरन्तरता दिने तर आफूले चाहेका बेला फिर्ता बोलाउने गरी सहमत गराएको कोशी एमालेका अध्यक्ष घनश्याम खतिवडाले जानकारी दिएका छन् । 

अब मुख्यमन्त्री कार्कीले अध्यक्षले आवश्यक ठानेको जुनसुकै बेला पदबाट हट्ने प्रतिबद्धता जनाएका छन् ।

यससँगै केही सातादेखि कोशी एमालेभित्र चर्किएको नेतृत्व विवाद तत्कालका लागि साम्य हुने संकेत देखिएको छ । तर अध्यक्ष ओलीले ‘अब छोड’ भन्ने दिन कहिले आउला ? गुण्डु छलफमा सहभागी एमाले कोशी प्रदेशका अध्यक्ष घनश्याम खतिवडाका अनुसार गुण्डुमा भएको छलफलमा कहिले भन्नेबारे केही तय भएको छैन । 

‘पार्टी अध्यक्षले पद छाड्नु भनेको बेला छोड्ने गरी अहिलेलाई हिक्मतजीकै नेतृत्वमा सरकारलाई निरन्तरता दिने सहमति भएको छ,’ खतिवडाले बुधबार साँझ भने, ‘अहिले सरकार उहाँकै नेतृत्वमा चल्छ । तर अध्यक्षले आवश्यक ठान्नुभएको बेला उहाँले मान्ने प्रतिबद्धता गर्नुभएको छ ।’ खतिवडाका अनुसार यो सहमति मुख्यमन्त्री कार्कीले स्वयं स्वीकार गरेका हुन् ।

‘अहिले निरन्तरता दिने र अध्यक्षले भनेका बेला आफूले मान्ने भनेर मुख्यमन्त्री स्वयंले भन्नुभएको छ,’ उनले भने ।

यो सहमतिसँगै मुख्यमन्त्री कार्कीले पछिल्ला केही सातादेखि सार्वजनिक रूपमा दोहो¥याउँदै आएको अडान त्यागेका छन् ।

अध्यक्ष ओलीले पटक–पटक मार्गप्रशस्त गर्न आग्रह गरे पनि कार्कीले त्यसलाई अस्वीकार गर्दै आएका थिए ।

व्यक्तिको आदेश होइन, पार्टीको संस्थागत निर्णय भए मात्रै पद छाड्छु भन्दै आएका कार्की अन्ततः ओलीले चाहेका बेला पद छाड्ने सहमतिमा पुगेका हुन् । 

सोमबार मात्रै विराटनगरमा सञ्चारकर्मीसँग उनले आफू संविधानको धारा १६८ को उपधारा (५) अन्तर्गत बनेको मुख्यमन्त्री भएकाले सामान्य राजनीतिक दबाबले सरकार परिवर्तन नहुने बताएका थिए ।

त्यसको भोलिपल्ट मंगलबार काठमाडौं पुगेर ओलीसँग भएको पहिलो भेटमा पनि उनले त्यही अडान दोहो¥याएका थिए । तर, बुधबारको दोस्रो चरणको छलफलपछि भने तत्काल सरकारलाई निरन्तरता दिने र अध्यक्षको भविष्यको निर्देशन मान्ने सहमतिमा उनी पुगेका छन् । 

तिलकुमार मेन्याङ्बोलाई जसरी पनि मुख्यमन्त्री बनाउने अभियानमा रहेका ओलीले अब कार्कीलाई पद छाड्न कहिले निर्देशन दिन्छन् भन्ने प्रश्न उठेको छ । 

अध्यक्षले त्यसो चाहिं कहिले भन्नुहुन्छ भन्ने प्रश्नमा प्रदेश अध्यक्ष खतिवडाले त्यसको कुनै समयसीमा नरहेको बताए । 

‘त्यो जहिले पनि हुन सक्छ । भोलि नै पनि हुनसक्छ । अर्को कुनै दिन पनि हुन सक्छ,’ उनले भने ।

यसले कार्कीको निरन्तरता सुनिश्चित गरे पनि उनको राजनीतिक भविष्य भने अझै अध्यक्ष ओलीकै निर्णयमा निर्भर रहने प्रष्ट संकेत दिएको छ ।

बुधबारको छलफलपछि गुण्डुबाट बाहिरिएका मुख्यमन्त्री कार्कीले भने विस्तृत टिप्पणी गर्न चाहेनन् । 

‘अध्यक्षज्यूसँग राम्रो कुराकानी भएको छ । भोलिसम्ममा टुंगो लाग्छ,’  उनले संक्षिप्त प्रतिक्रिया मात्रै दिए । उनलाई मंगलबारकै अडान दोहोर्याउनुभएको हो भन्ने प्रश्न सोधिएको थियो । तर उनले त्यसमा प्रतिक्रिया दिएनन् ।

एमालेभित्र पछिल्ला केही सातादेखि अध्यक्ष ओलीले संसदीय दलका उपनेता मेन्याङ्बोलाई मुख्यमन्त्री बनाउने तयारी गरिरहेका थिए । त्यसका लागि पार्टी सचिव शेरधन राईलाई विराटनगर पठाइएको थियो ।

संसदीय दलभित्र हस्ताक्षर अभियान चलेको चर्चा पनि भयो । तर कार्कीले राजीनामा दिन मानेका थिएनन् । 

पार्टीभित्रै पनि तत्काल नेतृत्व परिवर्तनको पक्षमा स्पष्ट बहुमत देखिएन । सरकार संविधानको धारा १६८(५) अन्तर्गत बनेकाले नेतृत्व परिवर्तनका संवैधानिक र राजनीतिक जोखिमबारे समेत नेताहरू विभाजित देखिएका थिए ।

यही अवस्थापछि विवाद समाधान गर्न कार्कीसहित प्रदेश नेतृत्वलाई काठमाडौं बोलाइएको थियो । 

एमालेका एक नेताका अनुसार बुधबार बिहानसम्म अध्यक्ष ओली तत्काल राजीनामाकै पक्षमा थिए । तर कार्कीसहितका नेताहरूले अहिले सरकार परिवर्तन गर्नु उपयुक्त नहुने अडान नछाडेपछि अन्ततः मध्यमार्गी बाटो निकालिएको हो ।

एमाले नेताहरुका अनुसार गुण्डु सहमतिको अर्थ कोशी सरकारको नेतृत्व अहिले कार्कीकै हातमा रहनेछ । 

तर त्यो निरन्तरता उनको आफ्नै राजनीतिक बलमा भन्दा पनि अध्यक्ष ओलीको अर्को निर्णय नआउँदासम्मका लागि मात्रै हुनेछ ।