मधेशी एकता र सहकार्यमा जोड

विराटनगर । मधेशी समुदायको सामाजिक तथा राजनीतिक उत्थानका निम्ति समुदायबिच आपसी एकता र सहकार्य आवश्यक रहेको विराटनगरमा आयोजित एक कार्यक्रमका वक्ताहरुले बताएका छन् । 

मधेशी उत्थान विचार मञ्चले विराटनगरमा आयोजना गरेको मधेशी एकता सम्मेलनमा बोल्ने वक्ताहरुले यस्तो बताएका हुन । एकता र सहकार्यबाटै जुनसुकै लक्ष्य हासिल गर्न सकिने भएकाले समुदायबीचको भावनात्मक एकता अपरिहार्य रहेको उनीहरुले बताएका छन् । 

सो अवसरमा बोल्दै संविधानसभा सदस्य पवनकुमार सारडाले मधेशीहरु अधिकार सम्पन्न हुने सवालमा विगत भन्दा अवस्था केही फेरिए पनि अझै पनि कर्मचारीतन्त्रको शीर्ष स्थानहरुमा समुदायको उपस्थित नगन्य रहेको दाबी गरे । 

जनता समाजवादी पार्टीका मोरङ अध्यक्ष मो.नसरुलले राजनीतिक पहुंचबाटै समुदायको उन्नयन सम्भव रहेकाले समुदायबाट सक्षम नेतृत्व निर्माणका लागि काम गर्नुपर्ने बताए । 

कार्यक्रम संयोजक उमेश यादवले मधेशीहरु विभिन्न जातीय समुदायमा विभाजित रहेका कारण अपेक्षित उपलब्धि हासिल हुन नसकेको बताउँदै भावनात्मक रुपमा एकजुट भएर अघि बढ्नु आवश्यक रहेको उल्लेख गरे ।

युवा अभियन्ता पंकजकुमार बर्माले मधेशी उत्थानका निम्ति समुदायभित्र रहेका बिकृति तथा बिसंगतिहरुको अन्त्य गर्न समेत सामुहिक पहल आवश्यक रहेको बताए । 

नेकपाका वसिम आलमले स्वार्थ परक एकता नभई स्वच्छ भावनाबाट प्रेरित एकता र सहकार्यबाट मात्र उपलब्धि हासिल गर्न सकिने बताए । 

देव सेवा समितिका अध्यक्ष राजेन्द्रप्रसाद देवले मधेशी समुदायका कैयन मुद्दाहरु साझा समस्या रहेकाले मञ्चको कार्यसमिति बिस्तार गरेर अघि बढ्नुपर्ने  सुझाव दिए ।

बुद्धिजीवी नन्दलाल साहको सभापतित्वमा भएको कार्यक्रममा नेपाली कांग्रेस मोरङका कार्यवाहक सभापति भक्तिनाथ माझी र राप्रपाका नेता प्रह्लादप्रसाद साह लगायतको उपस्थिति थियो ।