उद्योगी श्याम राठीबाट १३ लाख ५० हजार सहयोगको घोषणा

विराटनगर । भोटेकोशीको विनासकारी बाढीबाट प्रभावित परिवारहरूलाई राहतका लागि विराटनगरका उद्योगी श्याम राठीले १३ लाख ५० हजार रुपैयाँ सहयोग गर्ने घोषणा गरेका छन् । 

उद्योगी राठीले आफू आबद्ध दुई कम्पनी राठी केवलमार्फत ११ लाख र पल्लवी लुब्रिकेन्टमार्फत दुई लाख ५० हजार रुपैयाँ गरी जम्मा १३ लाख ५० हजार रुपैयाँ बाढीपीडित परिवारको राहतका लागि सरकारलाई प्रदान गर्ने बताएका हुन् ।

सो रकम भोटेकोशी बाढीबाट घरबारविहीन भएका व्यक्तिलाई तत्काल राहतका लागि उपयोग हुने अपेक्षा लिएको बताए । 

भोटेकोशी बाढीपछि विराटनगरका उद्योगी व्यवसायीले प्रधानमन्त्री राहत कोषमा ठूलो मात्रामा आर्थिक सहयोग गरिरहेका छन् । 

करीव सात सय मानिसको ज्यान गइसकेको भोटेकोशी बाढीपछि निजी क्षेत्रले राज्यप्रतिको कर्तव्यका रुपमा आर्थिक तथा खाद्यान्न सामग्री सहयोग गर्दै आएका छन् ।