विद्यार्थीको नेतृत्वमा एक लाखसहित पोखरिया माविबाट ६ लाख बढी राहत संकलन

विराटनगर । विराटनगर महानगरपालिका–३ स्थित पोखरिया माध्यमिक विद्यालयका विद्यार्थीको अगुवाईमा भोटेकोशी बाढीपीडितहरूका लागि राहत रकम संकलन गरिएको छ । 

विद्यालयमा रहेको बाल क्लवको अगुवाईमा १ लाख ५ हजार ६५० रुपैयाँ तथा अभिभावकबाट २२ हजार संकलन भएको विद्यालयका प्रधानाध्यापक खेमराज भट्टराईले जानकारी दिए । 

प्रअ भट्टराईका अनुसार विद्यालयले हालसम्म ६ लाख ५ हजार २४९ रुपैयाँ सहयोग गरेको छ । 

विद्यालयमा कार्यरत ४८ जना दरबन्दी तथा अनुदान शिक्षकहरूबाट ३ लाख ५३ हजार ५२८ र निजी स्रोत शिक्षकबाट १ लाख २४ हजार ६१ रुपैयाँ राहत संकलन भएको विद्यालयले जनाएको छ ।

गत भदौ १० गतेको विध्वंसकारी बाढीका पीडितलाई सहयोग गर्ने उद्देश्यले विद्यालय, बाल क्लव, अभिभावक लगायतको सक्रियतामा राहत रकम संकलन भएको प्रधानाध्यापक भट्टराईले जानकारी दिए ।