सडकको दुरवस्था मुख्य कारण, ठेकेदारले एक बर्षदेखि थुपारेको थियो गिट्टी

विराटनगर । समयमा गर्नुपर्ने काम नगर्दा सडकको दुरवस्थाले शुक्रबार बिहान  मोरङको बुढीगंगा गाउँपालिकामा तीन ज्यान गएको छ । बुढीगंगा–४ नेमुवामा भएको दुर्घटनामा दुई परिवारले आफ्ना तीन जना सन्तान गुमाएका छन् ।

सडक निर्माण गर्ने नाममा सडक भत्काउने र लामो समयसम्म त्यतिकै छाडिदिने प्रवृत्तिले बारम्बार दुर्घटना भइरहेका छन् । नेमुवामा शुक्रबार बिहान भएको दुर्घटनाको मुख्य कारण नै सडकको दुरवस्था देखिएको छ ।

दुर्घटना हुनुमा सडक निर्माणको काम सुरु गर्ने ठेकेदारको कमजोरी भएको बुढीगंगा गाउँपालिकाका अध्यक्ष जितनारायण थापा मगरले औंल्याएका छन् । गाउँपालिकाले सडकलाई भत्काएर नबनाई लामो अवधि त्यसै छाड्ने ठेकेदारलाई कारवाही गर्ने पनि उनले जनाएका छन् । ग्राभेल गर्न थुपारिएको मिक्स गिट्टी छल्ने क्रममा भारतीय नम्बरको लरी पल्टिएर तीन जना बालबालिकाको ज्यान गएको गाउँपालिका अध्यक्ष थापा मगर बताउँछन् ।

नेमुवा चोकबाट पूर्वतर्फ सुनसरी मोरङ सिँचाइ आयोजनाको नहरमा शुक्रबार बिहान आरजे २९ जीबी १५६१ नम्बरको लरी पल्टिएको थियो । नजिकै रहेको मार्बल उद्योगमा मार्बल कटिङ गर्न सो गाडीले भारतको राजस्थानबाट ढुङ्गा आकारको मार्बल बोकेको थियो । 

प्रहरीका अनुसार सडक छेउ सानो चिया पसल गरेर बसेका ज्योति अधिकारीको खुट्टा काम नलाग्ने गरी च्यापिएको छ । उनका ५ वर्षीय छोराछोरीहरू निशान र इशिता तथा छिमेकी बालिका ७ वर्षीया रिया खवासको ढुङ्गाले च्यापेर ज्यान गएको मोरङका प्रहरी उपरीक्षक नवराज कार्कीले बताए । तीनै जनाको शव पोष्टमार्टमका लागि कोशी अस्पताल विराटनगरमा राखिएको छ ।

नहरको डिलमा चिया पसल गरेर बसेका अधिकारी दम्पत्तीको विवाह भएको २० वर्षपछि एकैसाथ दुई सन्तान जन्मिएका थिए । ट्रक पल्टिन्छ भनेर हल्ला गर्दागर्दै पसलतर्फ लरी पल्टेको स्थानीय बताउँछन् । गाउँपालिकाका अध्यक्ष मगर ठेकेदारले सडक कालोपत्रे गर्न एक वर्षदेखि बाटोमा ढुङ्गा थुपारेर अवरोध गर्दै आएको बताउँछन् ।

ठेकेदारको लापर्वाहीले एक वर्षदेखि बाटोमा गिट्टी थुपारिएको बताउँदै गाउँपालिका अध्यक्ष मगरले यस्ता ठेकेदारलाई कारवाही हुने बताए । उनका अनुसार, सुनसरीको दुहबीका बासिन्दा अधिकारी केही वर्षदेखि सो ठाउँमा चिया पसल चलाएर बसेका थिए । 

ठुला ढुङ्गाले बालबालिकालाई किचेको खबर फैलिएपछि नेपाल प्रहरी र सशस्त्र प्रहरी उद्धारमा जुटेका थिए । ढुङ्गा काटेर बालबालिकाको शव निकाल्न साढे चार घण्टा समय लागेको मोरङका प्रहरी नायव उपरीक्षक रञ्जनकुमार दाहालले बताए । ढुङ्गा निकाल्नुअघि दुई वटा क्रेनले लरी उठाएको थियो । लरीले नहरको सडक ढाकेपछि उद्धारमा प्रयोग हुने अन्य उपकरण र एम्बुलेन्स छिराउने ठाउँ भएन ।

आक्रोशित देखिएका स्थानीयले लरीलाई पनि नहरमै पल्टाई दिन गरेको आग्रह गर्दै थिए । क्रेनले लरीलाई नहरभित्रै पल्टाएपछि डोजर र जेसीबी ढुङ्गा भएको ठाउँसम्म ल्याउन सम्भव भएको थियो ।