इटहरी भेट्रान गोल्डकपमा दमकको विजयी सुरुवात

सुनसरी । दमक भेट्रान क्लबले छै६ौं संस्करणको अन्तर्राष्ट्रिय आमन्त्रण इटहरी भेट्रान गोल्डकप फुटबल प्रतियोगितामा बिजयी सुरुवात गरेको छ ।

इटहरीस्थित जनता बहुमुखी क्याम्पसको खेलमैदानमा आइतबार भएको उद्घाटन खेलमा दमक भेट्रानले धरान भेट्रान क्लबलाई २–० गोल अन्तरले पराजित गर्दै विजयी सुरुवात गरेको हो । दमकका लागि तेजेन्द्र श्रेष्ठले १ गोल गरे । 

दमकले धरानबाट थप १ गोल आत्माघाती उपहार पाएको थियो । 

उद्घाटन खेलको उत्कृष्ट खेलाडीमा दमकका गोलरक्षक पंकज केसी घोषित भए । उनले धरानको आधा दर्जन प्रहारलाई बिफल बनाएका थिए ।

सोमबारको दोस्रो क्वाटरफाइनल खेल पथरी भेट्रान र मिल्स भेट्रान विराटनगरबीच प्रतिष्पर्धा हुने आयोजक हाम्रो इटहरी भेट्रान क्लबले जनाएको छ । 

चैत २८ गतेसम्म चल्ने प्रतियोगितामा एक भारतीय सहित ८ वटा टोलीको सहभागिता छ । 

प्रतियोगिताको विजेताले १ लाख १ हजार र उपविजेताले ५१ हजार रुपैयाँसहित ट्रफी हात पार्नेछ ।