मुख्यमन्त्री कार्कीको सचिवालय ७६ दिनपछि सार्वजनिक, असोज २८ कै मितिमा नियुक्ति भएका थिए सात जना

विराटनगर, १२ पुस । कोशी प्रदेशका मुख्यमन्त्री केदार कार्कीले मुख्यमन्त्री भएको ७६ दिनपछि सचिवालय सार्वजनिक गरेका छन् । सचिवालयमा नियुक्त भएका व्यक्ति र तिनको योग्यताबारे सोधखोज हुन थालेपछि मुख्यमन्त्री तथा मन्त्रिपरिषद्को कार्यालयले बिहीबार सचिवालयको नाम सार्वजनिक गरेको हो । कार्की गत असोज २७ गते मुख्यमन्त्री नियुक्त भएका हुन् । 

मुख्यमन्त्री कार्यालयका बैठक तथा प्रशासन सचिव ईश्वरकुमार गिरीले सचिवालयमा रहेका सम्पूर्ण कर्मचारीको विवरण प्राप्त नभएकाले वेबसाइटमा राख्न ढिलाइ भएको बताए । बिहीबार दिउँसोसम्म सचिवालयको नाम सार्वजनिक नगरिएको अवस्थामा सोधिएको प्रश्नमा गिरीले त्यस्तो जवाफ दिएका हुन् ।

• विवरण ढिलो सार्वजनिक गरिए पनि मुख्यमन्त्री कार्कीले असोज २७ गते सपथ लिएको भोलिपल्टै असोज २८ को मिति राखेर सात जनालाई सचिवालयमा नियुक्ति दिएका छन् । उनीहरूले सोही मितिबाट तलब भत्ता बुझिरहेका छन् ।

यद्यपि कार्यालयले यो समाचार तयार पार्दा भने मुख्यमन्त्री कार्कीको सचिवालयमा रहेका केही कर्मचारीको विवरण सार्वजनिक गरेको छ । मुख्यमन्त्री तथा मन्त्रिपरिषद् कार्यालयको वेबसाइटमा बिहीबार अपरान्ह १ बज्दासम्म पनि सचिवालयको विवरण सार्वजनिक भएको थिएन ।

मुख्यमन्त्री कार्यालयले त्यसपछि सार्वजनिक गरेको विवरणअनुसार, मुख्यमन्त्री कार्कीको सचिवालयमा जनसम्पर्क सल्लाहकारका रुपमा लीलाबल्लभ घिमिरे नियुक्त भएका छन् । उनको नाम १ नम्बरमा छ । उनी सहसचिवस्तरको जनसम्पर्क सल्लाहकारमा नियुक्त भएका हुन् । घिमिरे नेपाल पत्रकार महासंघ कोशी प्रदेश समिति अध्यक्ष पनि हुन् ।

मुख्यमन्त्री कार्कीले प्रेस सल्लाहकार भने पत्रकार देवनारायण साहलाई नियुक्त गरेका छन् । उनको नाम मुख्यमन्त्री कार्यालयले ३ नम्बरमा सार्वजनिक गरेको छ । २ नम्बरमा इञ्जिनियर खगेन्द्र कर्णको नाम छ । मुख्यमन्त्री कार्कीले कर्णलाई प्राविधिक सल्लाहकार नियुक्त गरेका छन् ।

सचिवालयमा प्राविधिक सल्लाहकार नियुक्त गर्ने कार्की पहिलो मुख्यमन्त्री हुन् । यसअघिका मुख्यमन्त्रीले प्राविधिक सल्लाहकार नियुक्ति गरेका थिएनन् । मुख्यमन्त्री कार्कीले प्रमुख स्वकीय सचिवमा कृतिभूषण बस्नेतलाई भर्खरै नियुक्त गरेका छन् ।

कोशी प्रदेशको मुख्यमन्त्री तथा मन्त्रिपरिषद् कार्यालयले मुख्यमन्त्रीको सचिवालयतर्फका आवास तथा कार्यालय सहयोगीसहित ९ जनाको नाम सार्वजनिक गरेको हो । त्यसमध्ये ३ जनाको फोटो र मोबाइल नम्बरसहितको विवरण सार्वजनिक गरिएको छ भने बाँकीको हकमा खाली राखिएको छ ।

कार्यालयका अनुसार सचिवालयमा रहेका सबै कर्मचारीको विवरण प्राप्त नभएकाले वेबसाइटमा राख्न ढिलाइ भएको हो । सचिवालय कार्यरत कर्मचारीको विवरण मगाइएको र प्राप्त भएलगत्तै उनीहरूको विवरण वेबसाइटमा राखिने मुख्यमन्त्री तथा मन्त्रिपरिषद्को कार्यालयका सचिव ईश्वरकुमार गिरीले बताए ।

‘सचिवालयलाई बलियो बनाउन कर्मचारीको नियुक्तिको क्रम जारी छ,’ सचिव गिरीले भने, ‘बिहीबार बेलुकासम्म हामीलाई प्राप्त नामसहितको विवरण राखिने छ । सचिवालयमा पछि थप भएको कर्मचारी विस्तारै अपडेट गरिने छ ।’

मुख्यमन्त्री कार्यालयले ढिलोगरी सचिवालयको विवरण सार्वजनिक गरे पनि सात जनाले भने असोज २८ गते नै नियुक्ति पाएको विवरण भेटिएको छ । मुख्यमन्त्री कार्कीले असोज २७ गते सपथ लिएको भोलिपल्टै सात जनालाई सचिवालयमा नियुक्त गरेका हुन् ।

असोज २८ गतेदेखि लागु हुने गरी एकैसाथ नियुक्ति पाएका सात जनाले सोही मितिबाट तलबभत्ता बुझिरहेका छन् । थप एक जना कर्मचारीलाई भने कात्तिक १ गते नियुक्त गरिएको छ ।

मुख्यमन्त्री तथा मन्त्रिपरिषद्को कार्यालयको विवरणअनुसार मुख्यमन्त्रीको सचिवालयमा प्रमुख स्वकीय सचिवका रुपमा कृतिभूषण बस्नेत नियुक्त भएका छन् । बस्नेतको नियुक्ति मिति भने खुलाइएको छैन ।

जनसम्पर्क सल्लाहकारका रुपमा लीलाबल्लभ घिमिरे, प्रेस सल्लाहकार देवनारायण साह, प्राविधिक सल्लाहकार इन्जिनियर खगेन्द्र कर्ण, स्वकीय सचिव दिवस राजवंशी, आवास सहयोगी रेनुका पण्डित, कार्यालय सहयोगी विक्रम राजवंशी र हलुका सवारी चालकका रुपमा अशोक राजवंशी असोज २८ गते नै नियुक्त भएका हुन् । सूचना प्रविधि सहायकका रुपमा नियुक्त भएका खेमराज सापकोटा भने कात्तिक १ गतेदेखि नियुक्त भएको विवरणमा देखिन्छ । 

मुख्यमन्त्रीको काममा सहजीकरण गर्न सचिवालय गठन गरिने कानुनी व्यवस्था छ । यस सम्बन्धी कार्यविधि प्रदेश मन्त्रिपरिषद्ले नै बनाउने भएकाले मुख्यमन्त्रीले आफूअनुकूल कार्यविधि बनाएर नियुक्ति गर्ने प्रचलन रहँदै आएको छ ।

मुख्यमन्त्री र मन्त्रीको पारिश्रमिक तथा सेवा सुविधासम्बन्धी ऐन, २०७५ लाई आधार बनाएर कार्यविधि बनाउने गरिएको छ । पछिल्लो कार्यविधिअनुसार प्रमुख स्वकीय सचिव १ जना, स्वकीय सचिव १ जना, राजनीतिक सल्लाकार १ जना, आर्थिक सल्लाकार १ जना, प्रेस सल्लाकार १ जना, सूचना प्रविधि विज्ञ १ जना र हलुका सवारी चालक र कार्यालयसहित आवास सहयोगी दुई/दुई जना नियुक्त गर्ने सकिने छ ।